निसान मोटर इन्डियाले बुधबार म्याग्नाइट रेड एडिसन लन्च गरेको छ । कम्पनीले यसको प्रारम्भिक मूल्य भारतीय बजारमा भारु. ७ लाख ८६ हजार ५ सय राखेको छ । कम्पनीले यसअघि जुलाई १८ मा निसान म्याग्नाइट रेड एडिसन सार्वजनिक गर्ने घोषणा गरेको थियो। तर बजारमा बढ्दो प्रतिस्पर्धालाई मध्येनजर गर्दै समय अगाडी नै लन्च गरेको हो । भारतमा कम्पनीले यसको बुकिङ सुरु गरिरहेको छ ।
यो गाडीको लुक नियमित एडिसन म्याग्नाइलभन्दा निकै आकर्षक र फरक हुने कम्पनीले दाबी गरेको छ । यसमा प्रदान गरिएको रेड हाइलाइट र क्रोम हिंट्ससहितका अतिरिक्त तत्वहरुले यसको लुक थप आकर्षक बनाएको छ । नयाँ निसान म्याग्नाइट रेड एडिसन तीन भेरियन्ट र दुई रङको विकल्पका साथ बजारमा उपलब्ध रहेको छ ।
एसयूभीको बाहिरी लुकमा कुरा गर्दा, यसमा रातो कलरको एक्सेन्ट रहेको हुन्छ जसले अगाडिको ग्रिल, अगाडिको बम्पर क्ल्याडिङ, ह्वील आर्च र बडी साइड क्ल्याडिङ लाई कभर गर्दछ । रातो रंगको एक्सेन्टको प्रयोगले यो एसयूभीलाई निकै स्पोर्टी लुक दिएको छ । यसका साथै, कारको भित्री भागमा पनि यस्तै एक्सेन्टहरू समावेश गरिएको छ जसमा रातो-थीम्ड ड्यासबोर्ड, डोर साइड आर्मरेस्टहरू र सेन्टर कन्सोलमा रातो एक्सेन्टहरू समावेश छन्।
यसमा वायरलेस चार्जर, एयर फिल्टर, एलइडी स्कफ प्लेट, एम्बियन्ट मुड लाइटिङ, एन्ड्रोइड अटो, ८.० इन्चको टचस्क्रिन, ७.० इन्च फुल इन्स्ट्रुमेन्ट क्लस्टर र प्रोजेक्शन गाइडसहितको रियर-भ्यू क्यामेरा जस्ता हाइ-टेक फिचरहरु रहेका छन् । यसमा रहेको टर्बोचार्ज्ड इन्जिनले ९८ बीएचपी पावर र १६० एनएम टर्क जेनेरेट गर्दछ । इन्जिनलाई ५-स्पीड म्यानुअल गियरबक्ससँग जोडिएको छ।
भारतमा यसले किया सोनेट, टाटा नेक्सन र मारुती सुजुकी ब्रेजासँग प्रतिस्पर्धा गर्ने अनुमान गरिएको छ ।
