भक्तपुरको चाँगुनारायण नगरपालिका-६ का वडाध्यक्ष धनबहादुर लामा भक्तपुर-नगरकोटको सडकमा कसैले चाँसो नदिएको भन्दै सकडमा आएका छन् । उनले सडकमै कुर्सी टेबल ल्याएर आफ्नो कार्यालयका कामहरु गरिरहेका छन्।
उनले ठेकदार शारदाप्रसाद अधिकारीको कामको प्रतिरोध गर्दै सडकमा उत्रिएको जनाएका छन् । यो सडक नबन्दा आन्तरिक र बाह्य पर्यटकलाई असर पुगेको उनले बताए ।
उनले भने, ‘हामीले धेरै पटक राज्यलाई यस सडकको अवस्था प्रति ध्यानाकर्षण गराऔं तर राज्यले कुनै पनि प्रतिकिर्या दिएन र सडक बन्ने छाँटकाँट नदेखेपछि हामी यो कदम चाल्न बाध्य भएका हौ ।’ यो कदमबाट नि ध्यानाकर्षण भएन भने हामीले अन्य विभिन्न कार्यक्रमको योजना बनाईरहेका छौ । अत्ति भयो भने सिंहदरबार, मन्त्रालयमा पुगेर अनशन नै बस्ने उनले बताए ।
यसका साथै, बाटो चाँडो नबने उनले ठेक्का रद्द गर्न पनि सरकारलाई माग गरेका छन् । आफूले पनि नबनाउने र अरूलाई पनि बनाउन नदिएपछि यस्तो अवस्था आएको उनले बताए । कन्स्ट्रक्सनले बल्लतल्त बनाएको ६-६ किलोमिटर बाटो पनि भत्किसकेको छ । वर्षातको मौसममा सवारी दुर्घटनाको जोखिम पनि बढिरहेको उनले बताए ।
सरकारले २०७१ असार २ गते भक्तपुरदेखि नगरकोटको भट्टेडाँडासम्म १५.६६० किलोमिटरको सडक स्तरोन्नतिका लागि सम्झौता गरेको थियो । उक्त सम्झौता अनुसार २०७३ असार ४ गते सम्ममा निर्माण सम्पन्न गरी बुझाउनुपर्ने थियो।
