हाल नेपाल राष्ट्र बैंक आगामी आर्थिक वर्षको मौद्रिक नीति बनाउँन तयार गरिरहेको छ । नयाँ आर्थिक वर्ष सुरु हुनलागे सँगै मौद्रिक नीति पनि अन्तिम चरणमा पुगिसकेको छ । राष्ट्र बैंकले योपालि कसैलाई नहेरि र कुनैपनि व्यवसायीको स्वार्थमा नलागी देशको आर्थिक अवस्था सुधार गर्ने गरि मौद्रिक नीति ल्याउने बताउँदै आईरहेको छ ।
यसअघि राष्ट्र बैंकले कडा मौद्रिक नीतिको लागि तयार हुन सबैलाई आग्रह गरेको थियो । यो आग्रहसँगै उद्योगी व्यवसायी तथा लगानीकर्ताहरूको मनमा एक प्रकारको डर उत्पन्न नहुने कुरै भएन । कोभिडका कारण थलिएका उद्योगी व्यवसायीहरु यो मौद्रिक नीति कस्तो होला भन्ने चिन्तामा छन् ।
मौद्रिक नीति तयार गर्नको लागि राष्ट्र बैंक विभिन्न व्यवसायी देखि लिएर सांसदहरुसँग सल्लाह सुझाव लिईरहेको छ । यसैक्रममा आज सोमबार बसेको बैठकमा नेपाली काँग्रेसका सांसद दिव्य राजभण्डारीले ४० लाख माथिका गाडीको आयातमा रोक लगाउँन आग्रह गरेका छन् । उनले अब देशले वर्षमा १६/१७ खर्वको व्यापार घाटा धान्न नसक्ने बताएका छन् ।
राष्ट्र बैंकले विशेषगरि बढ्दो आयात, व्यापार घाटा, घट्दो विदेशी मुद्राको चाप र मुलुक भित्रको तरलता व्यवस्थापनलाई प्राथमिकतामा राखेर मौद्रिक नीति ल्याउँने तयारी गरिरहेको छ । आयातमा कडाई गर्ने भनेसँगै अटो व्यवसायीहरु अहिले चिन्तित अवस्थामा रहेका छन् । सरकारले गाडीलाई चुरोट र रक्सीसँग दाँजिएको भन्दै गुनासो गर्दै आएका छन् ।
नाडा अटो मोबाइल्स एशोसिएशनका अध्यक्ष ध्रुव थापाले भने, ‘सरकारले हामीबाट धेरै राजस्व उठाउँदै आएको छ ।’ तर सरकारले हामीलाई सधैँ टार्गेटमा राख्ने गरेको र हामीलाई चुरोट र रक्सीसँग दाँजिएको उनले बताए ।
विगत ८/१० महिनादेखि अटो व्यवसाय ठप्प हुदैँ आईरहेको छ । यसले गर्दा अटो व्यवसायीहरुले बैंकको कर्जा तिर्न नसक्ने अवस्था रहेको बताउँदै आएका छन् । पछिल्लो समय अटो व्यवसायीहरु मौद्रिक नीतिबाट सहज बनाइदिन आग्रह गर्दै प्रधानमन्त्री, गभर्नरदेखि सम्बन्धित निकायका व्यत्तिहरुसँग भेटघाट गरिरहेका छन् ।
