कोविड लकडाउन, पार्ट्सको अभाव र बढ्दो प्रतिस्पर्धाको परिणाम सोरूप, टेस्लाले विश्वको सबैभन्दा ठूलो इलेक्ट्रिक वाहन निर्माताको रूपमा आफ्नो हैसियत गुमाएको छ ।वारेन बफेटको स्वामित्वमा रहेको चिनियाँ अटोमेकर कम्पनि, बीवाइडीले २०२२ को पहिलो ६ महिनामा टेस्ला भन्दा लगभग एक लाख बढी इलेक्ट्रिक गाडीहरू बेचेको छ ।
जूनमा समाप्त भएसँगै, यो ६ महिनाको अवधिमा, टेस्लाले विश्वव्यापी रूपमा ५ लाख ६४ हजार सवारी साधनहरू बिक्रि गरेको छ । आफ्नो वार्षिक लक्ष्य पूरा गर्न अबको ६ महिनामा टेस्लाले आफ्नो बिक्री ४६ प्रतिशतले बढाउनु पर्ने छ ।
यता, बीवाइडीले भने यो वर्षको पहिलो ६ महिनामा ६ लाख ४१ हजार सवारी साधनहरू विक्री गर्यो जुन अघिल्लो वर्षको सोही अवधिको तुलनामा ३०० प्रतिशतले बढी हो ।
बीवाइडीले आफ्नो पहिलो प्लग-इन हाइब्रिड कार २०१३ मा सुरु गरेको थियो र त्यसबेलादेखि आफ्नो इभी लाइनअपलाई द्रुत रूपमा विस्तार गरेको छ । गत वर्ष, बीवाइडीले लगभग ७ लाख ३० हजार सवारी साधनहरू बेचेको थियो, जसमध्ये ८० प्रतिशत विद्युतीय सवारीहरू थिए ।
