भारतले नेपाललाई ७५ वटा एम्बुलेन्स र १७ वटा विद्यालय बस उपहार दिएको छ। भारतले स्वतन्त्र भएको ७५ औं वर्षगाँठको अवसरमा अनुदान सहायता स्वरूप आइतबार आयोजित एक कार्यक्रममा ७५ वटा एम्बुलेन्स र १७ वटा विद्यालय बस दिएको हो ।
उक्त कार्यक्रममा शिक्षा, विज्ञान तथा प्रविधिमन्त्री देवेन्द्र पौडेल र नेपालका लागि भारतीय राजदूत नवीन श्रीवास्तवले उपस्थिति जनाएका थिए । कार्यक्रममा श्रीवास्तवले सम्बन्धित विभिन्न बस र एम्बुलेन्स प्रदान गरिएका संस्थालाई चाबी प्रदान गरेका थिए।
भारतले शिक्षा र स्वास्थमा केन्द्रित रहेर नेपालका विभिन्न जिल्लामा रहेका संघसंस्थाहरूको लागि उपहार दिएको हो । भारतीय दूतावासका अनुसार एम्बुलेन्स र बस नेपालका विभिन्न जिल्लामा अवस्थित विशेष गरी स्वास्थ्य र शिक्षाको क्षेत्रमा काम गर्ने विभिन्न सरकारी, गैरसरकारी तथा गैर नाफामूलक संस्थाहरूमा उपलब्ध गराईने जनाएको छ ।
भारतले सन् १९९४ देखि नेपाललाई अहिलसम्म ९४० वटा एम्बुलेन्स र १८४ वटा विद्यालय बस उपहारस्वरूप प्रदान गरेको छ ।
