पछिल्लो समय भारतमा विद्युतीय सवारी साधनको माग बढीरहेको छ । पेट्रोलियम पदार्थको मूल्य बढेसँगै भारतीय बजारमा विद्युतीय सवारीको माग बढेको हो । यसैलाई मध्येनजर गरेर एटुमोबाइल नामको नयाँ विद्युतीय सवारी ब्राण्डले विद्युतीय बाइक ‘एटुमभिएडर’ सार्वजनिक गरेको छ ।
यो बाइक क्याफे रेसर ढाँचामा तयार गरिएको हो । यसको मतलब यो बाइक आरामदायी भन्दा पनि गति र ह्यान्डलिङ को लागी अनुकूल रहेको छ । कम्पनीले यसको भारतीय बजारमा प्रारम्भिक मूल्य भारु ९९,९९९ रुपैयाँ तोकेको छ । कम्पनीका
अनुसार यो बाइक अहिले प्रारम्भिक मूल्यमा खरिद गर्न सकिने तर १००० युनिट बिक्रि भएपछि यसको मूल्य बढ्ने छ । सर्वसाधरणले कम्पनीको आधिकारिक वेभसाइटबाट प्रि-बुकिङ गर्दा मात्र भारु ९९९ तिर्नुपर्ने कम्पनीले जनाएको छ ।
हाललाई यो बाइक रातो, सेतो, निलो, कालो र ग्रे कलरको साथमा उपलब्ध रहेको छ । यो बाइकले एक पटक चार्जमा १०० किलोमिटरसम्मको रेन्ज दिने त यसको टप स्पीड ६५ किलोमिटर प्रतिघण्टासम्म पुग्ने कम्पनीले जनाएको छ । यो बाइकमा २.४ किलोवाट आवर ब्याट्री प्याक समावेश गरिएको छ । यसको बुट स्पेस १४ लिटरको छ। यो बाइकमा एलईडी इन्डिकेटर र टेलल्याम्प छन् ।
