हिजो मात्र काठमाडौँको मौसममा खराबी आउँदा त्रिभुवन अन्तर्राष्ट्रिय विमानस्थलमा अवतरण हुनुपर्ने जजिरा एयरको जहाज भैरहवास्थित गौतमबुद्ध अन्तर्राष्ट्रिय विमानस्थलमा अवतरण गरेको थियो । नेपालकै दोस्रो अन्तर्राष्ट्रिय विमानस्थलको रुपमा निर्मित गौतमबुद्धअन्तर्राष्ट्रिय जहाज डाइभर्ट भएर आएको यो पहिलो घटना थियो । गौतमबुद्ध बन्नुअघि अन्तर्राष्ट्रिय उडानका जहाज डाइभर्ट हुनुपर्ने अवस्था आएमा भारतका विमानस्थलको भर पर्नुपर्थ्यो ।
तर फेरी आज पुरानै कुरा दोहोर्याइएको छ । काठमाडौँमा अवतरण गर्न नसकेका २ भारतीय जहाज भने डाइभर्ट भएर भैरहवा नगई भारत नै फर्किए । नयाँ दिल्लीबाट काठमाडौँ आएका इन्डिगो र भिस्तारा एयरका जहाज काठमाडौँमा अवतरण गर्न नसकेपछि भैरहवा जानुको सट्टा भारतको लखनउमा गएर अवतरण भए । नेपालमा दोश्रो विमानस्थल नहुँदा कुनै जहाज डाइभर्ट गर्नु पर्ने अवस्था आउँदा भारतको पटना र लखनउमा डाइभर्ट हुँदै आएका थिए । अहिले नेपालमै अर्को अन्तराष्ट्रिय विमानस्थल सुरु भैसकेपछि पनि भारतीय जहाजहरु डाइभर्ट हुनुपर्दा भारतनै फर्किएका छन् ।
काठमाडौँको मौसम सफा छैन् भनेर इन्डिगो र भिस्ताराको जहाजलाई, सिमरा क्षेत्रमा हुँदै काठमाडौँको मौसमबारे जानकारी गराएको थियो । जहाजसँग त्यस छेत्रबाट नजिक पर्ने भैरहवा, पटना वा लखनउमा अवतरण गर्न सकिने ३ विकल्प थियो । तर, २० मिनेटको उडानमा अवतरण हुन सक्ने भैरहवा विमानस्थल छोडेर दुबै कम्पनीका विमान १ घण्टा उडेर लखनउ पुगेर अवतरण भए ।
त्यस्तै केहि समय अगाडी बुद्धजयन्तिको अवसर भारतीय प्रधानमन्त्रि लुम्बिनी आएका थिए । सो अवसरमा पनि मोदीले भैरहवास्थित गौतमबुद्ध अन्तर्राष्ट्रिय विमानस्थल प्रयोग गरेको थिएनन् । लुम्बिनीबाट केहि टाढा रहेको भारतकै विमानस्थलमा आएर त्यहाँबाट पुन हेलिकप्टरमा लुम्बिनी आएका थिए ।
भारतले भैरहवा अन्तराष्ट्रिय विमानस्थललाई अन्तराष्ट्रिय विमानस्थल नमानेका कारण भारतीय वायुसेवा कम्पनीका विमान नजिकको विमानस्थल छोडेर लखनउ फर्किएको नागरिक उड्डयन प्राधिकरण (क्यान) स्रोतले बताएको छ । अर्कोतर्फ, गौतमबुद्ध अन्तराष्ट्रिय विमानस्थल चिनियाँ लगानीमा बनेका कारण पनि भारतीयहरु यसप्रति सकारात्मक छैन ।
