चौधरी ग्रुप अन्तर्गतको सीजी मोटर्सले वातावरणमैत्री विद्युतीय सवारी ‘नेटा भी’ सार्वजनिक गरेको छ । विद्युतीय सवारी ब्रान्ड नेटाको ‘नेटा भी’ विद्युतीय कार नेपाली बजारमा सार्वजनिक गरिएको हो । सरकारको पेट्रोलियम पदार्थको मूल्य बृद्धि भएसँगै अब पेट्रोलियम पदार्थको खपत घटाएर आयात घटाउने योजनामा विद्युतीय सवारीलाई प्रवर्द्धन गर्ने उद्देश्यले यो कार सार्वजनिक गरेको कम्पनीको भनाइ छ । नेटा ब्रान्ड चिनियाँ मोटर उत्पादक कम्पनी होजोन अटोमोबाइलले उत्पादन गर्दै आएको छ ।
विश्व वातावरण दिवसको अवसर पारी नेपाल विद्युत प्राधिकरणका कार्यकारी निर्देशक कुलमान घिसिङ र विभिन्न प्रतिष्ठित व्यक्तिहरुद्वारा एक कार्यक्रमका बीच सो कार हिजो सार्वजनिक गरिएको छ । पेट्रोलियम पदार्थको आयात घटाई व्यापार घाटा कम गर्ने सरकारी नीतिलाई सहयोग पुर्याउन आफुहरुले विद्युतीय सवारीको प्रवद्र्धन गरेको सीजी मोटर्सका प्रबन्ध निर्देशक निर्वाण चौधरीले बताएका छन् ।
कम्पनीका अनुसार नेटा भीलाई एक पटक फुल चार्ज गरेपछि ३८० भन्दा बढी किलोमिटरसम्म सजिलै गुडाउन सकिनेछ । अधिकतम गति १०१ किलोमिटर प्रतिघण्टा रहेको याे कारमा ३८.५ किलोवाट आवरको ब्याट्री प्रयोग गरिएको छ। कारमा आठ वर्ष वा एक लाख ५० हजार किलोमिटरको वारेन्टी दिइएको छ । विभिन्न ५ रंगमा उपलब्ध कारको मूल्य ३७ लाख ९९ हजार रुपैयाँ तोकिएको छ ।
