यामाहाले आधिकारिक रूपमा नेपालमा पहिलो नियो-रेट्रो मोटरसाइकल FZ-X सार्वजनिक गरेको छ । यो यामाहा एफजेड प्लेटफर्ममा आधारित नयाँ नियो-रेट्रो कम्युटर मोटरसाइकल हो ।
नेपालका लागि यामाहा मोटरसाइकलको आधिकारिक वितरक एमएडब्लु इन्टरप्राइजेजले नेपालमा पहिलो पटक नियो रेट्रो १५० सीसी मोटरसाइकल लन्च गरेको छ । FZ-X सहरमा घुम्नका लागि र लामो यात्राको लागि पनि सहज राइडिङ पोजिसनसहित निर्माण गरिएको छ । आधुनिक र किफायती बाइक खोज्नेहरूका लागि पनि यो उपयुक्त हुनेछ ।
FZ-X मा १४९ cc को एकल-सिलिन्डर इन्जिन रहेको छ । यो ७२५० rpm मा १२.४ bhp को अधिकतम पावर आउटपुट र ५५०० rpm मा १३.३ Nm पीक टर्कको साथ एयर-कूल्ड ४-स्ट्रोक १४९ cc SOHC, २-भल्भ, एकल-सिलिन्डर ईन्धन-इन्जेक्टेड “ब्लू कोर” इन्जिनसँग आउँछ । इन्जिन पाँच-स्पीड गियरबक्ससँग जोडिएको छ । मोटरसाइकलमा सिंगल च्यानल एबीएस सहित दुवै छेउमा डिस्क ब्रेकहरू छन् । यसमा साइड स्ट्यान्ड इन्जिन कट-अफ स्विच पनि छ जुन आज भोलि हरेक बाईकको अनिवार्य सुविधा हो।
FZ-X मेटालिक ब्लू, म्याट कपर र म्याट ब्ल्याक गरी तीन आकर्षक रंगमा उपलब्ध रहेको छ । यामाहा FZX को नेपालमा मूल्य ४.२६ लाख बाट सुरु हुन्छ । यसले बजाज पल्सर एनएस १६०, टिभिएस अपाचे आरटीआर १६० र सुजुकी जिक्सरसँग प्रतिस्पर्धा गर्ने अनुमान लाउन सकिन्छ ।
