नेपाल पर्यटन बोर्डले पर्यटकको सहजताको लागि एयरपोर्टदेखि काठमाडौंको विभिन्न ठाउँमा सटल बस सेवा सञ्चालन गर्ने भएको छ । सरकारले चुनावलाई मध्येनजर गरेर सार्वजनिक तथा निजि सवारीसाधनमा रोक लगाउने निर्णय गरेको थियो । यसबिच, हवाई पर्यटकलाई एयरपोर्टदेखि होटेल पुग्न कुनैपनि असुविधा नहोस् भनेर नेपाल पर्यटन बोर्डले सटल बस सेवा सञ्चालन गरेको हो ।
पर्यटकले होटेलदेखि एयरपोर्टसम्मको पनि सटल बस सेवा प्राप्त गर्न सक्दछन् । सटल बस सेवा प्राप्त गर्ने पर्यटकले प्रतिव्यक्ति ३०० रुपैयाँ शुल्क तिर्नुपर्नेछ ।
गाडीका रुटः
रुट १
एअरपोर्ट–एनएसी–होटल अन्नपूर्ण–होटल याक एन्ड यति–ठमेल चोक–लैनचौर चोक–शंकर होटल–एम्बासडर होटल–एयरपोर्ट
रुट २
एयरपोर्ट–होटल र्याडिसन–सांग्रिला होटल–नारायण गोपाल चोक–महाराजगंज चोक–हायात रिजेन्सी–चाबहिल चोक–होटल द्वारिका–एयरपोर्ट
रुट ३
एअरपोर्ट–तीनकुने चोक–होटल एभरेस्ट–माइतीघर चोक–होटल हिमालयन–होटल सोल्टी–ग्रान्ड होटल–एयरपोर्ट ।
चुनावको दिन के चल्ने के नचल्ने ?
निजि सवारी साधन पनि प्रशासनको अनुमति पासबिना चलाउँन नपाईने निर्वाचन आयोगले जनाएको छ । काम विशेषले सञ्चालन गर्नुपर्ने अवस्था आए सर्वसाधरणले अनिवार्य रूपमा जिल्ला निर्वाचन अधिकृतको कार्यालयबाट पास लिनुपर्नेछ ।
अपांगता भएका मतदाताका हकमा सम्बन्धित मुख्य निर्वाचन अधिकृतबाट सवारी अनुमति लिएर एकाघरका एक जनासहित मतदानस्थलमा जाने मापदण्ड तय गरिएको छ ।
अत्ति आवश्यक सवारी साधन जस्तै एम्बुलेन्स, खानेपानीको ट्याङ्कर, दमकल, दूरसञ्चार सेवा, शव बाहन, अस्पताल सेवा तथा विद्युत सेवाले भने पास बिनै चलाउँन पाउँने छन् । अन्तर्राष्ट्रिय हवाई उडान गर्ने यात्रुले पासपोर्ट, भिसा र हवाई टिकट देखाएको आधारमा यात्रा गर्न पाउँनेछन् ।
