यातायात व्यवस्था सेवा कार्यालयले अब चितवनमा सवारी चालक अनुमतिपत्र (लाइसेन्स) वितरण गर्ने योजना बनाईरहेको छ । चितवनमा कार्यालयले दुईपाङ्ग्रे, तीनपाङ्ग्रे तथा चारपाङ्ग्रे साना मझौला र ठूला सवारीसाधनको लाइसेन्स वितरण गर्न लागेको हो । कार्यालयले जेठको दोस्रो सातादेखि सेवा सुचारु गर्ने हिसाबले तयारी तिर्व रुपमा थालेको छ । यसका लागि कार्यालयले परीक्षास्थल र सवारीसाधनका लागि प्रस्ताव आह्वान गरेको छ।
कार्यालयले प्रयोगात्मक परीक्षाका लागि वैशाख २ गते परामर्श सेवा प्रस्ताव आह्वान गरेको थियो । प्रस्तावहरु टन्नै आएका र यसको विस्तृर अध्ययन गरी काम अघि बढ्ने बागमती प्रदेशको श्रम, रोजगार तथा यातायात मन्त्रालयका सचिव नेत्र शर्माले जनाएका छन् । चितवनमा सुरुमा सातामा एकपटक परीक्षा लिने गरी तयारी गरिएको छ।
हाल चितवनवासी लाइसेन्स लिन काठमाडौँ वा हेटौँडा पुग्नु पर्ने अवस्था रहेको छ । यो बाध्यताको अब अन्त्य हुने र सर्वसाधरणको पैसा र समय बचत हुने शर्माले बताए ।
कार्यालयले बागमती प्रदेशमा वार्षिक एक लाख नयाँ अनुमतिपत्र वितरण गर्दै आएको छ । प्रदेशमा करिव १८ लाख मानिससँग लाइसेन्स भएको कार्यालयले जनाएको छ ।
