नेपाल विज्ञान तथा प्रविधि प्रज्ञा प्रतिष्ठान (नास्ट)ले बनाएको विद्युतीय स्कुटर बिहीबार उर्जा, जलस्रोत तथा सिंचाइमन्त्री फम्फा भुसालले सार्वजनिक गरेकी हुन् । स्कुटर बनाउन लुम्बिनी प्रदेश सरकारले पनि सहयोग गरेका थियो ।
स्कुटरलाई सार्वजनिक गर्दै मन्त्री भुसालले नास्टको प्राविधिक सहयोगमा प्रदेश सरकारहरुले व्यवसायिक ढंगले यस्ता विद्युतीय सामाग्रीहरुको उत्पादनमा जोड दिनुपर्ने बताइन् । पेट्रोलियम पदार्थको माग र मूल्य निकै बढ्दै गईरहेको हुनाले अब देशमा पेट्रोलियम पदार्थको खपत घटाउँदै विद्युतीय खपत बढाउन बाएक अरु उपाय नभएको बताइन् ।
‘अबको केही वर्षमा नेपालकाे जलविद्युत बंगलादेशदेखि श्रीलंकासम्म बेच्न सकिने अवस्था आउने छ । हामी अब जलविद्युत उपभोग बढाउने मात्रै नभई निर्यातसम्म गर्छौं’ उनले भनिन् । नास्टले पनि अब अरु देशले बनाएको जस्तै नयाँ कुरा अनुसन्धान गर्नुपर्ने बताइन् । उनले नयाँ आविष्कार र अनुसन्धानलाई मन्त्रालयले सधैं साथ दिने भन्दै दैनिक उपयोगी अनुसन्धानहरु गर्न आग्रह गरिन् ।
एक पटक चार्ज गर्दा ५० किलोमिटर सजिलै कुदाउन सकिने
नास्टले बनाएको विद्युतीय स्कुटरको मुख्य विशेषता भनेको एकपटक चार्ज गर्दा ५० किलोमिटर गुड्ने क्षमता हो । नास्टका प्रविधि संकाय प्रमुख एवं इलेक्ट्रिक स्कुटर निर्माण कार्यक्रमका प्रमुख रवीन्द्र ढकालका अनुसार एउटा मात्र स्कुटर बनाउदा धेरै खर्च लागेता पनि अब धेरैवटा एकैचोटी बनाउदा खर्च घट्ने बताएका छन् ।
अरु स्कुटरमा जस्तै अगाडि सामान र पछाडि मान्छे बस्न मिल्ने छ । उकालोमा पनि एकजना चड्दा सजिलै चल्ने नास्टको दाबी छ । स्कुटरमा दुई किलोवाट दूई ब्याट्री जडान भएको छ । नास्टका उपकुलपति डा. सुनिलबाबु श्रेष्ठले विद्युतीय स्कुटर जीवन उपयोगी हुने बताए । उनले नास्टले आगामी दिन अझै यस्ता विषयहरुमा अनुसन्धानलाई तीव्रता दिँदै स्कुटर निर्माणमा सहभागी प्राविधिक टोलीलाई सम्मान समेत गरेका थिए ।
