हुन्डाई क्रेटाले GNCAP क्र्यास टेस्टमा वयस्क र बालबालिकाको सुरक्षाका लागि ३-स्टार रेटिङ प्राप्त गरेको छ। प्रयोगकर्ता माझ धेरै नै लोकप्रिय रहेको C-SUV हुन्डाई क्रेटा, ग्लोबल NCAP द्वारा परीक्षणको पछिल्लो चरणमा परीक्षण गरिएका मोडेलहरूमध्ये एक थियो ।
कम्प्याक्ट एसयूभीले वयस्क र बालबालिकाको सुरक्षामा ३-स्टार रेटिङ पाएको छ । परीक्षण गरिएको मोडेल एन्ट्री-लेभल ई ट्रिम थियो जसमा उच्च मोडेलहरूमा उपलब्ध हुने साइड र पर्दा एयरब्यागहरू जस्ता केही सुरक्षा सुविधाहरू छुटेको थियो ।
ग्लोबल NCAP द्वारा सेकेन्ड जेनेरेसन हुन्डाई क्रेटाको फ्रन्टल अफसेट क्र्यास टेस्ट गराईएको थियो । क्र्यास टेस्ट ६४ किलोमिटर प्रतिघण्टाको गतिमा भएको थियो र परीक्षण निकायले यस परीक्षणमा कारको बडी ‘अस्थिर’ रहेको र ‘थप लोडिङ झेल्न’ नसक्ने बताएको थियो ।
C-SUV हुन्डाई क्रेटाले वयस्क सुरक्षामा ८/१७ अंक हासिल गरेको थियो । टेस्टमा चालकको टाउकोमा प्रदान गरिएको सुरक्षा ‘पर्याप्त’ र यात्रुको टाउकोका लागि ‘राम्रो’ रहेको उल्लेख गरिएको छ। त्यसैगरि अगाडि बसेका दुबै डमीहरूको घाँटीमा ‘राम्रो’ तर छातीको सुरक्षालाई ‘ठिकै’ रहेको उल्लेख गरिएको छ । साथै, दुबै डमीहरूको घुँडाको सुरक्षालाई ‘ठिकै’ दर्जा दिइएको छ र परीक्षण निकायले ड्यासबोर्डको पछाडि राखिएको संरचनाहरूसँग सम्पर्कमा आउँदा खतरनाक हुनसक्ने परीक्षण निकायले उल्लेख गरेको छ।
बालबालिकाको सुरक्षाको सन्दर्भमा, हुण्डाई क्रेटाले ४९ मध्ये २८.२९ अंकका साथ ३ स्टार रेटिङ प्राप्त गर्यो । एन्ट्री-लेभल ई ट्रिमले केही अंकहरू गुमाएको छ किनभने यसले ISOFIX चाइल्ड सिट रिस्ट्रेन्टहरू प्रदान गर्दैन र दुर्घटनाको बेला सिट बेल्टले टाउको अगाडी आउनबाट रोक्दैन ।
