नेपाली बजारमा ११० सीसीको स्कुटर उपलब्ध गराउँदै आएको हिरोले अब भने १२५ सीसीको स्कुटर उपलब्ध गराउने भएको छ । नेपालीको स्कुटर प्रतिको बढ्दो चासोलाई मध्यनजर गरेर यो स्कुटर ल्याएको कम्पनीले जनाएको छ ।
‘मेस्ट्रो एज १२५’ स्कुटरको नेपाली मूल्य २ लाख ६६ हजार रहेको कम्पनीले जनाएको छ ।
स्कुटरमा एलइडी हेडल्याम्प, फुल डिजिटल स्पीडोमिटर, कल अलर्ट सहितको ब्लुटुथ कनेक्टिभिटी र टर्न-बाइ-टर्न नेभिगेसन जस्ता सुविधाहरु रहेका छन् । यस सुविधाले ग्राहकहरुमा पहिलेको तुलनामा स्कुटर चलाउँदा फरक अनुभव दिने कम्पनीले जनाएको छ । यसका साथै यो सुविधाले युवालाई स्कुटर किन्न प्रेरित गर्ने कम्पनीले जनाएको छ ।
स्कुटरमा १२४.६ सीसी बीएस– सिक्स अनुरूप प्रोग्राम गरिएको फ्युल इन्जेक्सन इन्जिन ‘एक्ससेन्स टेक्नोलोजी’ रहेको छ । यसले ७००० आरपीएममा ९ बीएचपीको पावर र ५५०० आरपीएममा १०.४ एनएमको ‘टर्क अन डिमान्ड’ जेनेरेट गर्दछ ।
बाहिरी लुक र डिजाइन भने यसमा सबै नयाँ हेडल्याम्प, शार्प फ्रन्ट डिजाइन, नयाँ स्पोर्टी डुअल टोन स्ट्राइप, मास्क विङ्कर र नयाँ प्रिज्म्याटिक कलरहरू सहित नयाँ डिजाइनले भरिएको छ ।
