बाइक स्टार्ट गर्न समस्या भइरहेको छ ? खास गरि गर्मी मौसममा भन्दा जाडोमा बाइक र स्कुटरहरू प्रायः स्टार्ट गर्न कठिनाइहरू भइ रहन्छन् । जाडो मौसममा बाइक बाहिर पार्क गर्दा इन्जिन चिसो हुन्छ । जसका कारण स्टार्ट गर्न निकै मिहिनेत गर्नुपर्ने हुन्छ । यस्तो अवस्थामा बाइक स्टार्ट गर्न धेरै समय खेर जान्छ र कहिलेकाहीँ बाइक स्टार्ट पनि हुँदैन । हामी यहाँ जाडोमा सजिलै बाइक स्टार्ट गर्ने केही महत्त्वपूर्ण टिप्स बताइरहेका छौं –
१. खुला ठाउँमा बाइक पार्क नगर्नुहोस्:
जाडोमा खुला आकाशमुनि बाइक पार्क गर्नेलाई स्टार्ट गर्न झनै समस्या हुने गरेको छ । चिसोमा मोटरसाइकल लामो समयसम्म बाहिर पार्किङ गरेमा इन्जिन आयल सामान्य तापक्रम भन्दा चिसो हुन्छ । जसका कारण इन्जिन स्टार्ट गर्न समस्या हुन्छ । यस्तो अवस्थामा बाइकलाई छतमुनि वा धेरै चिसो नभएको बन्द ठाउँमा पार्क गर्ने प्रयास गर्नुहोस् । यसबाहेक, पार्क गर्दा बाइक कभरले बाइकलाई छोप्नुहोस्, यसले इन्जिनको तापक्रम धेरै घटाउँदैन ।
२. स्टार्ट गर्ने बित्तिकै बाइक नकुदाउनुहोस् :
बाइक स्टार्ट गर्ने बित्तिकै कुदाउने गर्नु हुन्छ भने यसो नगर्नुहोस् । बाइक स्टार्ट भइसके पछि पनि केहिबेर नकुदाइकन एक्सेलेटरलाई बढाउनुहोस् । यसले इन्जिनलाई तातिने मौका दिनेछ र चलिरहेको बेला बन्द हुने छैन । बाइक स्टार्ट गर्दा सँधै यति कुरा ध्यानमा राखे बाइकको इन्जिन पनि लामो समयसम्म राम्रो रहन्छ ।
३. छ भने किक स्टार्ट गर्नुहोस्:
जाडोमा बाइक स्टार्ट गर्न समस्या भएमा सेल्फ स्टार्ट गर्नुको सट्टा किक प्रयोग गर्नुहोस् । किक स्टार्टले बाइक स्टार्ट गर्न सजिलो बनाउँछ । यद्यपि, आजकल धेरै आधुनिक बाइकहरूमा किक स्टार्ट हुँदैन, त्यसैले तिनीहरूसँग सेल्फ स्टार्ट गर्ने विकल्प मात्र हुन्छ ।
४. स्पार्क प्लग सफा गर्नुहोस्:
स्पार्क प्लगमा फोहोर जम्मा हुँदा पनि बाइक स्टार्ट हुँदैन । यस्तो अवस्थामा बाइक वा स्कुटरको स्पार्क प्लग नियमित रूपमा सफा गर्नुपर्छ । यसबाहेक, बाइकलाई समयमै सर्भिसिङ गरिरहनुहोस् ।
५. ब्याट्री चार्ज गर्नुहोस्:
बाइकको इन्जिन सुरु गर्न ब्याट्रीले महत्त्वपूर्ण भूमिका खेल्छ । यदि ब्याट्री डिस्चार्ज भयो वा यसको तारहरुमा केहि गडबड भयो भने बाइक स्टार्ट हुँदैन । यदि तार खराब अवस्थामा छ वा ब्याट्री डिस्चार्ज भएको छ भने, मेकानिकद्वारा मर्मत गरी चार्ज गराउनु राम्रो हुन्छ ।
