यदि तपाईंले अत्यन्त सावधानीपूर्वक ड्राइभ गर्नु भयो भने सडकमा ड्राइभिङको अनुभव धेरै रमाइलो हुन्छ । सडकमा सवारी चलाउँदा अलिकति लापरवाहीले ठूलो खतरा निम्त्याउन सक्छ । सवारी चलाउँदा धेरै पटक नजानेरै गल्ती हुने गरेको छ भने कहिले अन्य सवारीलाई ओभरटेक गर्ने दौडमा दुर्घटनाको सिकार हुने गरेको छ । सवारी चलाउँदा गलत ओभरटेकिङका कारण दुर्घटना बढ्दै गएको छ ।
यस्तो अवस्थामा, हामीले सुरक्षित भइ ओभरटेक गर्ने तरिकाहरू जान्नु महत्त्वपूर्ण छ । यहाँ आज हामी तपाईलाई केही यस्ता टिप्स बताउनेछौँ, जसलाई थाहा पाएर तपाईले सडकमा दौडिरहेका अन्य सवारीलाई होसियारीपूर्वक ओभरटेक गर्न सक्नुहुन्छ ।
१. पछाडि हेर्ने ऐनाकाे प्रयोग गर्नुहोस्
हिजोआज बाइकबाट पछाडि हेर्नका लागि बनाइएका ऐना निकाल्ने फेसन भैसकेको छ । पछाडि हेर्ने ऐनाको प्रयोग नगर्नु सडक दुर्घटनाको प्रमुख कारण हो । यो समस्या समाधान गर्न सवारी साधनमा पछाडि हेर्ने ऐनाको प्रयोगलाई ट्राफिक नियमले अनिवार्य गरेको छ ।
गाडीबाट पछाडि हेर्ने ऐना हटाउनु निकै खतरनाक हुन्छ । सवारीसाधनमा पछाडि हेर्ने ऐना नभएको खण्डमा पछाडीबाट आउने सवारी साधनलाई बाटोमा देख्न सकिँदैन । यस्तो अवस्थामा ओभरटेक गर्नुभयाे भने पछाडिबाट आउँदै गरेको गाडीले ठक्कर दिन सक्छ ।
२. टर्न सिग्नलहरू प्रयोग गर्नुहोस्
धेरैजसो चालकहरूकाे घुम्ती बाटोमा टर्न सिग्नलको प्रयोग गर्ने बानी हुदैन । टर्न सिग्नल तपाईको गाडीका लागि मात्र आवश्यक छैन । यसको प्रयोग गरेर अगाडि र पछाडिबाट आउने सवारीलाई तपाई कुन दिशामा घुम्न चाहनुहुन्छ भन्ने पनि थाहा हुन्छ ।
यदि तपाइ सवारी साधन ओभरटेक गर्दै हुनुहुन्छ भने टर्न सिग्नलकाे प्रयोग गर्नुपर्छ । यसबाट पछाडिबाट आउने सवारी साधनलाई लेन परिवर्तन गर्ने वा अगाडिको सवारी साधनलाई ओभरटेक गर्ने भन्ने कुरा थाहा हुन्छ । टर्न सिग्नलको प्रयोगले राजमार्ग वा सहरको भीडभाड भएका सडकहरूमा सवारी साधनहरूलाई निर्देशन दिन धेरै सहयोगी हुन्छ ।
३. घुमाउरो सडकहरूमा यी सावधानीहरू अपनाउनुहोस्
घुमाउरो वा तीव्र मोडमा ओभरटेक गर्न खतरनाक छ । यस्ता सडकमा न अगाडिबाट आउने सवारीसाधन थाहा पाउन सकिन्छ न पछाडीबाट आउने । यस्तो अवस्थामा अगाडि बढ्न हतार गर्नु जाेखिमपुर्ण साबित हुन सक्छ । सडककाे मोड हतारमा ओभरटेक गर्ने गल्ती नगर्नुहोस् । मोड सकिएपछि अगाडिको गाडीलाई सिग्नल दिएर ओभरटेक गर्ने प्रयास गर्नुहोस् ।
४. एकै समयमा धेरै सवारी साधन ओभरटेक नगर्नुहोस्
हामी सडकमा अरु सवारीसाधन भन्दा अलिक अगाडि जानका लागि एकैपटक धेरै सवारीसाधनलाई ओभरटेक गर्ने गल्ती गर्छौं । यस्तो अवस्थामा ओभरटेक गर्दा विशेष ख्याल गर्नुपर्छ । सडकमा हरेक सवारीसाधन फरक–फरक गतिमा गुड्ने भएकाले अर्को सवारीसाधनको सही गति नबुझी ओभरटेक गर्दा खतरा हुनसक्छ । छिटो ओभरटेक गर्दा, तपाईं ढिलो चलिरहेको सवारी साधनहरु संग टक्कर गर्न सक्नुहुन्छ । त्यसैले एक पटकमा एउटा मात्र गाडी ओभरटेक गर्नुहोस् ।
५. अर्को सवारीसाधनलाई ओभरटेक गरिरहेको गाडीलाई ओभरटेक नगर्नुहोस्
सडकमा अरु गाडीले ओभरटेक गरिरहेको देखेमा ओभरटेक नगर्नुहोस् । अर्को गाडीलाई ओभरटेक गरिरहेको गाडीलाई ओभरटेक गर्न सडकमा पर्याप्त ठाउँ चाहिन्छ । यस्तो अवस्थामा सडक सिंगल लेनको छ भने अगाडिबाट आउने सवारीसाधनलाई ठक्कर दिने वा गाडीमाथिको नियन्त्रण गुमाउन सक्छ ।
