मारुती सुजुकीले एसयूभी ‘भिटारा ब्रेजाको’ नयाँ जेनरेशन मोडल लन्च गर्ने योजना बनाएको छ । विशेषगरि कम्पनीले डिजाइनमा केन्द्रित भएर नयाँ मोडल सार्वजनिक गर्न लागेको हो । हालै कम्पनीले यो मोडलको सडक परीक्षण गरिरहेको कम्पनीले जनाएको छ ।
सडक परीक्षण गर्ने क्रमको भिडियोमा यो मोडल नयाँ एलोय पांग्रा सहित महत्वपूर्ण रुपमा डिजाइन गरिएको फ्रन्ट फेससँग देखिएको छ । २०२२ को मारुती ब्रेजा मोडलमा नयाँ डिजाइन गरिएको ग्रिल, अपडेट गरिएको बम्पर र एल-आकारको डीआरएलहरू सहित नयाँ हेडल्याम्प हुनेछ । पुन: डिजाइन गरिएको हुड र अगाडीको फन्डर (टायर माथिको कभर) ले यो मोडललाई नयाँ लुक दिएको छ ।
ग्राहकले यो नयाँ मोडलमा नयाँ टेललाइट सहित सुधारिएको रियर बम्पर पाउनेछन् । नयाँ मोडलको नम्बर प्लेट हालको मोडलको भन्दा केही तल हुनेछ । सुरक्षा र सुविधाको हिसाबमा यसमा अहिलेको भन्दा धेरै उपकरणहरू हुनेछन् । सुरक्षाका लागि ६ एयरब्यागहरू हुनेछ ।
यसमा ठूलो टचस्क्रिन, वायरलेस चार्जर, फ्याक्ट्री फिटेड सनरुफ, सिममा आधारित कनेक्टिभिटी, र हेड अप डिस्प्ले जस्ता सुविधाहरू हुने कम्पनीले जनाएको छ ।
कम्पनीले नयाँ ब्रेजालाई राम्रो हाइब्रिड प्रणालीको साथ प्रस्तुत गर्न सक्ने बताइएको छ जसले गर्दा यसको माइलेजमा पनि सुधार हुनेछ ।
