सामान्यतया कारको ब्याट्रीको आयु कारमालिकको विचारमा ब्याट्री काम नलाग्ने नभएसम्म र गाडीमा जसोतसो काम आउँदासम्म बाँकी रहन्छ । तर प्राबिधिकरुपमा अधिकांश कारकाे ब्याट्रीहरू तीन देखि पाँच वर्षको अवधिको लागि उपयोगी हुन्छन् । हामीले यहाँ दिएको जानकारीहरुलाई ध्यानमा राख्नुहोस् ताकि तपाई आफ्नो कारको ब्याट्रीको आयू सचेत रहन सक्नु हुन्छ ।
ब्याट्री कति पुरानो ?
कारकाे ब्याट्री कति पुरानो भन्ने निर्धारण गर्नै धेरै तरिकाहरू छन् । यदि तपाईले नयाँ कार किन्नु भएको हो भने त्यसमा ब्याट्री पनि नयाँ हुन्छ । यसैले तपाईले किनेको समय जत्ति नै ब्याट्री चलाएको भन्ने जानकारी पाउन सक्नु हुन्छ । यसाे हुँदा ब्याट्री कति समय पुरानो हो भन्ने थाहा पाउन सजिलाे हुन्छ ।
ब्याट्री कति पुरानो हो भन्ने निर्धारण गर्ने एउटा थप सजिलो तरिका भनेको नयाँ ब्याट्री खरिद गर्दा पाउने रसिद पनि हुन सक्छ । तपाईले ब्याट्री खरिद गर्दा पाएको रसिदमा हेरेर ब्याट्री किनेको मिति थाहा पाउन सक्नु हुन्छ । यसले ब्याट्री कति पुरानो हो भन्ने सजिलै थाहा हुन्छ । यदि रसिद छैन भने, डिलरशिप वा अटो पार्ट्स जहाँबाट खरिद गर्नुभयाे त्यहाँ रेकर्डमा बिक्रीको बिल हुन सक्छ, जसले खरिदको मिति पाउन सक्नु हुन्छ ।
पहिलो चरणमा ब्याट्रीमा छापिएको मिति जानकारी भएको स्टिकर खोज्ने । उदाहरणको लागि, “10/20” को सरल अर्थ हो कि ब्याट्री अक्टोबर २०२० मा निर्मित हो ।
यदि त्यहाँ कुनै मिति स्टिकर छैन भने, ब्याट्रीमा बुझ्न सकिने अल्फान्यूमेरिक कोडको साथ स्ट्रिप वा स्ट्याम्प हुनेछ । यी जानकारीहरु सामान्यतया ब्याट्री कभरमा र कहिलेकाहीँ ब्याट्रीमा नै पाइन्छ । यसमा क्रमबद्ध रूपमा पहिलो दुई क्यारेक्टरहरूमा मिति जानकारी दिएकाे हुन्छ ।
पहिलो क्यारेक्टर शून्य देखि नौसम्मको संख्या हुने गर्दछ, जुन ब्याट्री निर्माण भएको वर्षको अन्तिम अंकसँग मेल खान्छ । उदाहरणको लागी, नौको मतलब 2019 हुन्छ । दोस्रो अक्षरले ब्याट्री बनाइएको महिनालाई जनाउँछ ।
A देखि L अक्षरहरू जनवरी देखि डिसेम्बरमा सिधै मेल खान्छन् । उदाहरणको लागि, अक्षर ‘C’ को अर्थ मार्च हुन्छ । यसलाई सँगै राखिएको छ भने “9C” ले मार्च 2019 को उत्पादन मितिलाई जनाउँछ । यी “9C” र “C9” का रुपमा अगाडि पछाडि पनि हुन सक्छन् तर यसको अर्थ एउटै हुन्छ ।
यदि ब्याट्रीमा कुनै कोड छैन भने, तपाईंले व्याट्रीको अवस्थाका आधारमा यसको उमेर अनुमान गर्न आवश्यक छ । टर्मिनलहरूमा र वरपर खियाको मात्रा उमेरको सूचक हो । यसमा जति धेरै खिया हुन्छ, ब्याट्रीको उमेर त्यति नै लामो हुन्छ ।
ब्याट्री खराब हुने अवस्था
ब्याट्री बदल्न आवश्यक छ भन्ने सबै भन्दा सामान्य संकेत भनेको जब तपाईकाे कारले इन्जिन सुरु गर्न संघर्ष गरिरहेको जस्तो आवाज निकाल्न थाल्छ, तब ब्याट्री बदल्नु पर्ने हुन सक्छ भनेको हो । यदि तपाईंले यो याद गर्नुभयो भने, तपाईंकाे कार बन्द हुँदा हेडलाइटहरू बालेर ब्याट्री जाँच गर्न सक्नुहुन्छ ।
हेडलाइटहरू चम्किलो नहुनु ब्याट्रीकाे जीवन अन्त्यमा पुगेको संकेत हो । यद्यपि, चिसो तापक्रमका कारण ब्याट्री फेल हुँदा वा लामो समयसम्म कार नचलाउँदा पनि यस्तो हुन सक्छ । याे बिग्रिन लागेको ब्याट्रीको सूचक हो ।
जम्प स्टार्टले ब्याट्रीलाई ठिक गर्न सक्छ । यसबाट ब्याट्रीको पावर सामान्य अवस्थासम्म फिर्ता आउन सक्छ । तर ब्याट्री पुरानो र कमजोर छ भने, जम्प स्टार्ट समाधान होइन । यसले केहि समयलाई काम गर्न सक्छ तर निकट भविष्यमा नै तपाईले फेरि दुख पाउनु हुन सक्छ ।
