रुस-युक्रेन युद्धको प्रभाव स्वरुप विश्वकै सवारी साधन उत्पादकहरु जोखिममा पर्ने आकलन गरिएको छ । सवारी साधनको बजारको लेखाजोखा गर्ने संस्था एसएण्डपी ग्लोबल मोबिलिटीले रुस-युक्रेन युद्धको प्रभाव स्वरुप विश्वकै सवारी साधन उत्पादकहरु जोखिममा पर्ने आकलन गरेको छ ।
एसएण्डपी ग्लोबल मोबिलिटीले रुस-युक्रेन युद्धको कारण माग अनुसार सवारी साधनहरु उत्पादन हुन नसक्ने बरु उत्पादन अझ घट्ने बताएको हो । एसएण्डपी ग्लोबल मोबिलिटीले सन् २०२२ र २०२३ मा उत्पादन २६ लाख थान भन्दा बढिले घट्ने बताएको हो । उसका अनुसार २०२२ मा ८ करोड १६ लाख र २०२३ मा ८ करोड ८५ लाख थान हलुका सवारी साधनहरु मात्र उत्पादन हुन सक्छन् ।
एसएण्डपी ग्लोबल मोबिलिटी अनुसार चिप निर्माणमा अत्यावश्यक नियोन ग्यासको आपुर्तिमा हुने अफ्ठ्यारो तथा पालाडियमको अभावले उत्पादनमा भारी कटौति हुने छ । अन्तराष्ट्रिय बजारमा नियोन ग्यासको आपुर्तिकर्ता युक्रेन हो भने पालाडियमका लागि रुस सबै भन्दा ठुलो आपूर्तिकर्ता हो । यसले गर्दा स्थिति एकदमै खराब भएमा ४० लाख थान हलुका सवारी साधनहरुको उत्पादनमा कटौति गर्नु पर्ने हुन सक्छ ।
कोरोना भाइरसको महामारीका कारण थिलथिलो भएको विश्वको सवारी साधन उद्योग भर्खर उठ्न लाग्दै थियो । तर यहि समयमा भएको रुस-युक्रेन युद्धले गर्दा यो उद्योगमा थप प्रहार भएको छ । योसँगै सेमिकण्डक्टरहरुको अभावले पनि उद्योगमा असर गरेको थियो ।
यस्ता विविध कारणहरुले गर्दा केहि कार निर्माताहरुले यहि हप्ता आफ्ना उत्पादन बन्द गर्ने तथा उत्पादनहरुको मूल्य बढाएका छन् । यसले गर्दा विश्व सवारी साधन उद्योगको वृद्धि पहिले आकलन गरे भन्दा कम हुने प्रक्षेपण गरिएको छ ।
विश्व सवारी साधन उद्योगको २०२१ मा २.७ ट्रिलियन युएस डलर बराबरको थियो भने यसले २०२२ मा २.८ ट्रिलियन डलर छुने अनुमान गरिएको थियो ।
