एक पटकको पूरा चार्जमा ४ सय ३९ किलोमिटर यात्रा गर्न सकिने विद्युतीय कार सार्वजनिक हुन लागेको छ । आफ्नो नयाँ विद्युतीय गाडी एक पटकको पूरा चार्जमा ४ सय ३९ किलोमिटरको रेन्ज दिने उत्पादक कम्पनी बिएमडब्लुले बताएको हो । बिएमडब्लुका उत्पादनहरुको सूचिमा थपिन लागेको यो मोडल आइएक्स-१ हुनेछ ।
लामो दुरीको यात्राका लागि प्रयोग गर्न सकिने गरि उत्पादन हुन लागेको यो मोडल पर्फमेन्सका दृष्टीले पनि अब्बल हुने कम्पनीले बताएको छ । प्रारम्भिकरुपमा सार्वजनिक गरिएको स्केचका आधारमा हेर्दा यो गाडी बिएमडब्ल्यु आइएक्स ३ बाट प्रभावित भएको देखिन्छ ।
यतिबेला बिएमडब्लु आइएक्स-१ को परीक्षण हुँदैछ । यो सन् २०२२ को अन्तिमसम्ममा भने सार्वजनिक हुने अनुमान छ । हालसम्म कम्पनीले यसको सार्वजनिक मितीबारे घोषणा गरेको छैन । तर अर्को महिना सार्वजनिक हुन लागेको मोडल पछि यो मोडल पनि सार्वजनिक गर्ने पालोमा पर्ने अनुमान गरिएको छ ।
बिएमडब्लु अर्को महिना आफ्नो लक्जरी सेडान आइ ७ सार्वजनिक गर्न लाग्दैछ । अप्रिल २० मा हुने बैइजिङ अटो सोमा बिएमडब्लुले आफ्नो मोडल बिएमडब्लु आइ ७ सार्वजनिक गर्न लागेको हो । कम्पनीको दाबी छ कि आइ ७ संसारकै पहिलो इलेक्ट्रिक लक्जरी सेडान हुनेछ जसले एक पटकको पुरा चार्जमा ६०० किलोमिटर भन्दा बढिको रेञ्ज प्रदान गर्न सक्छ ।
बिएमडब्लु आइ ७ मा क्रिस्टल ग्लासको प्रयोग गरिएको छ भने ३१ इन्च लामो थिएटर स्क्रिन राखिएको हुनेछ, जसमा ८के रिजोलुसन हुनेछ । यो मोडलमा नयाँ मोड तथा नयाँ पुस्ताको आइड्राइभ अपरेटिङ सिस्टमको प्रयोग गरिएको छ । यसले गर्दा आफ्नो ड्राइभिङ अनुकुलतामा चालकलाई थप सहजता प्रदान गर्नेछ ।
