भारतको बैंगलोरमा रहेको स्टार्टअप कम्पनी ओवेन इलेक्ट्रीकले आफ्नो पहिलो इलेक्ट्रीक मोटरसाइकल सार्वजनिक गरेको छ । कम्पनीले भारतमा यसको मुल्य ९९ हजार राखेको छ र यसको बुकिङ्ग पनि खुलिसकेको छ ।
‘ओवेन रोर’ नामाकरण गरिएको उक्त बाइकको डिजाइन ‘नियो-क्लासिकल’ रहेको छ । यसमा राउण्डसेप एलइडी हेडल्याम्पका साथै स्प्लीट सिट, स्प्लीट ग्रयावरेल, अलाय ह्वील, इन्टिग्रेटेड गोलाकार एलइडी डिआरएल रहेको छ । बाइकमा स्थायी चुम्बक मोटर प्रयोग गरिएको छ जसले १० किलोवाट उच्च आउटपुट र ४ किलोवाट निरन्तर आउटपुट उत्पादन गर्दछ । यो मोटरसाइकलमा ४.४ किलोवाट क्षमताको ब्याट्री प्याक जडान गरिएको छ ।
रोरले ६२ एनएमको टर्क विकास गर्छ जसले तीन सेकेन्डमा ०-४० स्पीड पुरा गर्न सक्दछ । टप स्पीड १०० किलोमिटर प्रतिघन्टा रहेको यो बाइक दुई घण्टामा पूर्ण रूपमा रिचार्ज हुन्छ र त्यसपछि यसले २०० किलोमिटरको रेन्ज प्रदान गर्दछ । यसमा तीनवटा सवारी मोडहरू, इको, सिटी र ह्याभोक उपलब्ध छ जसको टप स्पीड क्रमशः ५० किलोमिटर प्रतिघन्टा, ७० किलोमिटर प्रतिघन्टा र १०० किलोमिटर प्रतिघन्टा रहेको छ ।
हाल यो बाइक भारतको महाराष्ट्रबाट विक्री सुरु भएको छ । चाडै नै भारतभरी बिक्रि खुला गर्ने कम्पनीले जनाएको छ ।
