फोर्ड इन्डियाले नेपालमा रहेका आफ्ना ग्राहकहरूलाई फोर्ड गाडीहरूमा सेवा, पार्टपुर्जा र वारेन्टीका लागि निरन्तर सहयोग गर्ने बताएको छ । अमेरिकी कार निर्माता कम्पनी फोर्डले सन् २०२१ को सेप्टेम्बरदेखि भारतमा आफ्नो उत्पादन प्रक्रिया बन्द गरेपछि सो निर्णय घोषणा गरिएको हो । नेपाली बजारमा भित्रिएका फोर्डका गाडीहरू भारतमा निर्मित हुन् ।
फोर्डले #कमिटेड टू सर्भ (#CommittedToServe) नामक नयाँ अभियान सुरू गरेको छ । यो अभियानसँगै नेपाली उपभोक्ताहरूलाई पार्टपुर्जाको सहज उपलब्धी, मर्मत सम्भार, सर्भिसिङ र वारेन्टीको सहयोग प्रदानमा कम्पनीले थप प्रतिबद्धता जनाएको छ । साथै, सेवाको गुणस्तरमा पारिवारिक अनुभूतिको समेत प्रतिबद्धता रहेको कम्पनीको भनाइ छ ।
‘पारिवारिक अनुभूतिको प्रतिबद्धता जस्तै फोर्डको सेवाको बारेमा कमिटेड टू सर्भ अभियान अघि बढाइएको हो । जसअनुरुप फोर्ड तपाईंहरूको साथमा छ भन्ने विश्वस्त पार्नेछौं । यो प्रतिबद्धता नेपालमा जिओ फोर्डमा रहेका सक्षम र व्यावसायिक टोलीमार्फत तपाईंहरूलाई दिइ रहनेछ,’ फोर्ड इन्डियाका मार्केटिङ, सेल्स र सर्भिसका कार्यकारी निर्देशक विनय रैनाले भनेका छन् ।
नेपालमा फोर्ड गाडीको आधिकारिक आयातकर्ता तथा वितरक जिओ अटोमोबाइल्स प्रालि हो । भारतीय अखबार अटोकारको वार्षिक भेइकल मेन्टेनेन्स सर्भेमा फोर्डको सेवा प्रतिको प्रतिबद्धता स्थिर रहेको प्रमाणित भएको छ, जसकारण यो ब्रान्ड सो अवार्ड जित्ने सबैभन्दा किफायती ब्रान्डहरू मध्ये एक बनेको छ । उक्त सर्वेक्षणअनुसार फोर्डको सर्भिस र पार्टपुर्जाहरू सबैभन्दा किफायती छन् ।
यसमा जिओ अटोमोबाइल्सका प्रबन्ध निर्देशक आकाश गोल्छा भन्छन्, ‘हामी फोर्ड एभरेष्ट, फोर्ड रेन्जर र फोर्ड र्याप्टर जस्ता मोडलहरू तेस्रो मुलुकबाट आयात जारी राख्नेछौं । र, स्पेयर पार्टस्को उपलब्धता र वारेन्टी पनि उपलब्ध गराउने छौं । यसले नेपालभरि रहेका फोर्डको सेवा केन्द्रहरूबाट सेवा निरन्तर राख्न सहयोग गर्नेछ र हामीलाई ग्राहकहरूलाई अझ प्रभावकारी रूपमा सेवा दिन मद्दत गर्नेछ ।’
