नेपाली बजारमा सबै जसो मोटरसाइकल ब्राण्डहरुले फाइनान्स सुबिधामा मोटरसाइकल उपलब्ध गराउँदै आएका छन् । बीएमडब्लूका मोटरसाइकलमा फाइनान्स स्किम उपलब्ध रहेको बताउँदै आधिकारीक विक्रेता टर्क मोटर्सका मार्केटीङ हेड दिपेश श्रेष्ठ भन्छन्, ‘हामीले कम्पनीका नाममा मोटरसाइकल किन्नेलाई ३० प्रतिशत र व्यक्तिको नाममा किन्नेलाई ५० प्रतिशत डाउन पेमेन्टमा मोटरसाइकल उपलब्ध गराउँदै आएका छौं ।’
बीएमडब्लू मोटरसाइकल किन्न चाहने ग्राहकले ३० प्रतिशत डाउन पेमेन्टमा किन्न पाउने भएका छन् । तर, कम्पनीले ३० प्रतिशत डाउन पेमेन्टको अफर भने कम्पनीको नाममा किन्ने ग्राहकलाई मात्रै दिएको छ । ब्यक्तिको नाममा किन्न चाहनेले भने ५० प्रतिशत डाउन पेमेन्ट गर्नु पर्ने हुन्छ ।
बीएमडब्ल्यु ब्राण्डका मोटरसाइकल फाइनान्स सुबिधामा मोटरसाइक खरिद गर्ने ग्राहकले ३ बर्षको अवधि र १५ प्रतिशत ब्याज तिर्नु पर्ने कम्पनीले जनाएको छ । कम्पनीले विक्री गर्ने जी ३१० आर र जी ३१० जिएसम तीन कर अप्सनमा उपलब्ध छ । जी ३१० आरको काइनाइट ब्लु मेटालीकको मूल्य १३ लाख ७५ हजार, कस्मीक ब्ल्याकको मूल्य १३ लाख ५० हजार र लाइमस्टोन मेटालीकको मूल्य १३ लाख ७५ हजार रुपैयाँ रहेको छ ।
त्यस्तै जी ३१० जीएसको र्याली स्टाइलको मूल्य १४ लाख ७५ हजार रुपैयाँ, ट्रीपल ब्ल्याक र ह्वाइटको मूल्य १४ लाख ५० हजार रुपैयाँ निर्धारण गरेको छ । फाइनान्स स्कीमको साथमा २० हजार नगद छुट र २५ हजार बराबरको हेलमेटसमेत निःशुल्क उपलब्ध गराउँदै आएको छ । कम्पनीले बीएमडब्लूका जी ३१० आर र जी ३१० जीएस मोडल विक्री गर्दै आएको छ । कम्पनीले केही समय अघिमात्र बीएस ६ भर्सनमा यी दुई मोटरसाइकल ल्याएको थियो ।
यसका अलावा कम्पनीले बीएमडब्लूका अन्य मोडल पनि ग्राहकको माग अनुसार प्रि-बुकिङ गरेर मगाउन सक्नेछन् ।
